വ്യാപാരി വ്യവസായി സമൂഹത്തിന്‍റെ ആവകാശങ്ങള്‍ക്കായി സംഘടനകള്‍ പലതും നിലവിലുണ്ടെങ്കിലും വ്യാപാരി വ്യവസായികളെയും അവരുടെ ആവശ്യങ്ങളെയും ഒറ്റപ്പെടുത്തുന്ന കാഴ്ചയാണ് അനുഭവപ്പെട്ടിട്ടുള്ളത്. ചെറുകിട വ്യാപാരി വ്യവസായികളുടെ കച്ചവടം വളരെ ശുഷ്കിച്ചു വരുന്നു. ധാരാളം തൊഴിലാളികള്‍ക്കു ജോലിയും കൂലിയും അന്നവും കൊടുത്തു വന്നിരുന്ന വ്യാപാര വ്യവസായ മേഖല നശിച്ചു പോകുന്നതിനൊപ്പം സ്വയം തൊഴില്‍ നഷ്ടപ്പെട്ടു പോകുന്ന അവസ്ഥയിലോട്ട് തള്ളിവിടുന്ന ആധുനിക കമ്പോള വ്യവസ്ഥകള്‍ വാര്‍ഷിക ബജറ്റുകളില്‍ വ്യാപാരി വ്യവസായികളെ ചൂഷണം ചെയ്യുന്ന അജണ്ടകള്‍, വ്യാപാരി വ്യവസായികളെ ഉډൂലനം ചെയ്യുന്ന കോര്‍പ്പറേറ്റുകളുടെ മൂല്യാപഹരണം കച്ചവടക്കാരെ ബുദ്ധിമുട്ടിക്കുന്ന ട്രാഫിക് പരിഷ്ക്കാരങ്ങളും ആധുനിക വത്ക്കരണം എന്ന പേരില്‍ നടപ്പാക്കപ്പെടുന്നു.

കച്ചവടക്കാരെ കശാപ്പു ചെയ്യുന്ന നയങ്ങളും അനുബന്ധ പ്രവര്‍ത്തികളും നടപ്പാക്കുമ്പോള്‍ റവന്യുവിന്‍റെ മുഖ്യപങ്കും വ്യാപാരി വ്യവസായികള്‍ ആണെന്ന വസ്തുത പലപ്പോഴും മറന്നു പോകുന്ന ഗവണ്‍മെന്‍റുകള്‍, പ്രതിഷേധങ്ങള്‍ കടയടപ്പില്‍ തട്ടിനില്‍ക്കപ്പെടുന്ന അവസ്ഥ, വ്യാപാരി സമൂഹവുമായി ചര്‍ച്ചയില്ല, പദ്ധതികളില്ല, അന്തിമ ഫലം വന്‍കിട കോര്‍പ്പറേറ്റുകള്‍ക്കുള്ള വിജയം.